యూనివర్సల్ హీరో కమల్ హాసన్, క్లాసిక్ చిత్రాలను తీసే దర్శకుడు మణిరత్నం చాలా కాలం తర్వాత కలిసి చేసిన సినిమా ‘థగ్ లైఫ్’. ఈ కాంబినేషన్లో సినిమా వస్తోంది అన్న వార్తతోనే అభిమానుల్లో భారీ అంచనాలు ఏర్పడ్డాయి. కమల్ సరసన శింబు, త్రిష వంటి స్టార్స్ ఉండడంతో ఈ సినిమా ఎలా ఉండబోతోందోనని ప్రేక్షకులు ఆసక్తిగా ఎదురుచూశారు.
అయితే జూన్ 5న థియేటర్లలోకి వచ్చిన ఈ సినిమా ఆశించిన స్థాయిలో మెప్పించలేకపోయింది. స్టోరీ టెల్లింగ్, ప్రెజెంటేషన్, ఎమోషన్స్ అన్నీ కలిసి చాలా పాయింట్లలో ప్రేక్షకులను ఆకట్టుకోలేకపోయాయి. దాంతో ఈ సినిమాకు ఫ్లాట్ రెస్పాన్స్ వచ్చింది. ఎక్కడా హైపైంట్ లేకపోవడంతో చాలామంది విమర్శకులు ఇది కమల్ – మణిరత్నం కాంబినేషన్కి తగిన ఫలితం కాదని అభిప్రాయపడుతున్నారు.
ఇక ఈ సినిమా రిలీజ్ సమయంలో కమల్ హాసన్ కొన్ని వ్యాఖ్యలు చేసిన నేపథ్యంలో కన్నడ రాష్ట్రంలో వ్యతిరేకత మొదలైంది. ఆయన మాట్లాడిన మాటలు కన్నడ ప్రజల్లో ఆగ్రహాన్ని రేపాయి. దాంతో అక్కడి డిస్ట్రిబ్యూటర్లు ఈ సినిమా విడుదలకి ముందుగా కమల్ క్షమాపణ చెప్పాలంటూ డిమాండ్ చేశారు. అయితే కమల్ నుంచి ఎలాంటి స్పందన రాకపోవడంతో ‘థగ్ లైఫ్’ సినిమా కర్ణాటకలో రిలీజ్ కాలేదు.
ఇప్పుడు ఈ సినిమాకు వచ్చిన నెగిటివ్ టాక్ చూసిన తర్వాత కర్ణాటక ప్రేక్షకులు తాము తప్పించుకున్నామని భావిస్తున్నారు. సోషల్ మీడియా వేదికగా ఈ విషయాన్ని హైలైట్ చేస్తూ తమ రాష్ట్రంలో ఈ సినిమా విడుదల కాకపోవడాన్ని మంచిదే అంటూ రియాక్ట్ అవుతున్నారు. వారి మాటల్లో చెప్పాలంటే… “ఇతర రాష్ట్రాల్లో ఉన్నవారిలా మేము కూడా ఓ ఫ్లాప్ సినిమాకి బలి కాలేకపోయాం, అదృష్టమే” అనే ఫీల్లో ఉన్నారు.
ఇక మొత్తంగా చెప్పాలంటే, భారీ అంచనాల నడుమ విడుదలైన ఈ సినిమా కనీసం అటు కమర్షియల్గానైనా నిలవలేకపోయింది. పైగా రాజకీయ వ్యాఖ్యల ప్రభావం వేరే రాష్ట్రాల్లో కూడా ఎలా ఉంటుందో చూడాలి.