ఆది పినిశెట్టి హీరోగా, డైరెక్టర్ అరివళగన్ కలిసి తీసిన వైశాలి సినిమా ఎంత పెద్ద హిట్టో అందరికీ తెలిసిందే. తాజాగా వీరిద్దరి కాంబోలో మరో సూపర్‌ ప్రాజెక్ట్‌ తో ప్రేక్షకుల ముందుకు రాబోతున్నారు. ఆ సినిమా పేరును ”శబ్దం” గా ఖరారు చేశారు. ఈ సినిమాని 7G ఫిల్మ్స్ శివ, ఆల్ఫా ఫ్రేమ్స్ సంయుక్తంగా నిర్మిస్తుండగా, ఎస్ భానుప్రియ శివ సహ నిర్మాతగా వ్యవహరిస్తున్నారు.
ఇంతకు ముందే ఈ సినిమా ఫస్ట్‌లుక్‌ని విడుదల చేసిన మేకర్స్ శుక్రవారం సినిమా టీజర్‌ను విడుదల చేశారు. టాలీవుడ్‌ అగ్ర నటుడు విక్టరీ వెంకటేష్ టీజర్ లాంచ్ చేశారు. ఇక ఈ టీజర్‌లో సినిమాలో అదిరిపోయే సెటప్‌ని పరిచయం చేయడంతో పాటు ఉత్కంఠమైన అనుభూతిని అందిస్తున్నారు. హీరో ఆది పినిశెట్టి ఒక హాంటెడ్ హౌస్ వద్ద కొన్ని వింత సంఘటనలు జరిగేటప్పుడు కొన్ని విచిత్రమైన శబ్దాలను రికార్డ్ చేయడం వీడియోలో కనిపిస్తుంది.
ఇక టీజర్‌లో సినిమాలోని ప్రముఖ నటీనటులందరినీ చూపించారు మేకర్స్. టీజర్ అంచనాలను పెంచేయగా ఆది పినిశెట్టి తన పాత్రలో అద్భుతంగా కనిపిస్తున్నాడు.ఇక దర్శకుడు అరివళగన్ ఒక యూనిక్ కాన్సెప్ట్‌తో టీజర్ ని టెర్రిఫిక్ గా ప్రజెంట్ చేశారని చెప్పొచ్చు. అరుణ్ పద్మనాభన్ కెమెరా పనితనం సినిమా మీద మరింత ఉత్కంఠతని క్రియేట్ చేసేలా ఉంది. ఇవైశాలిలో చాలా రైన్ బేస్డ్ సన్నివేశాలు ఉండగా, శబ్దం సినిమాలో చాలా సన్నివేశాలు పర్వతాలు, పర్యాటక ప్రదేశాలలో చిత్రీకరించబడ్డాయని అంటున్నారు.
ముంబై, మున్నార్, చెన్నైలోని అనేక ప్రదేశాలలో ఈ సినిమా చిత్రీకరించారని, సినిమా కోసం 120 ఏళ్ల నాటి లైబ్రరీని నిర్మించారని మేకర్స్ వెల్లడించారు.. సిమ్రాన్, లైలా, లక్ష్మీ మీనన్, రెడిన్ కింగ్స్లీ, ఎం.ఎస్. భాస్కర్, రాజీవ్ మీనన్ కీలక పాత్రల్లో కనిపించనున్నారు.