రౌడీ హీరో విజయ్ దేవరకొండ గత కొంత కాలం నుంచి వరుస అపజయాలను చవి చూస్తున్నప్పటికీ వరుస సినిమాలు చేస్తూ ముందుకు దూసుకుపోతున్నాడు. తాజాగా విజయ్ నటించిన సినిమా ఫ్యామిలీ స్టార్‌ , స్టార్‌ ప్రొడ్యూసర్‌ నిర్మించిన ఈ చిత్రం ఎన్నో అంచనాల మధ్య ప్రేక్షకుల మధ్యకు వచ్చినప్పటికీ ఈ సినిమా ఆ అంచనాలను అందుకోలేకపోయింది.
థియేటర్లలో నెగిటివ్‌ టాక్‌ ను అందుకున్న ఈ సినిమా ఓటీటీలో మాత్రం దూసుకుపోతుంది. ప్రస్తుతం విజయ్ గౌతమ్ తిన్ననూరి డైరెక్షన్‌ లో ఓ స్పై పీరియాడిక్ యాక్షన్ సినిమా చేస్తున్నాడు. ఈ సినిమా ప్రస్తుతం షూటింగ్ దశలో ఉంది. తాజాగా విజయ్ దేవరకొండ తన తరువాత సినిమాను ప్రకటించారు. మరోసారి దిల్ రాజు నిర్మాణంలో విజయ్ సినిమా చేస్తున్నాడు. రాజావారు రాణిగారు సినిమా దర్శకుడు రవి కిరణ్ కోలా ఈ సినిమాను తెరకెక్కిస్తున్నాడు.
రీసెంట్ ఈ సినిమాను చిత్రయూనిట్ అధికారికంగా ప్రకటించింది. రూరల్ యాక్షన్ డ్రామాగా ఈ సినిమా ఉండనుందని వారు తెలిపారు. అయితే విజయ్ దేవరకొండ తో హిట్టు ఫ్లాప్ తో సంబంధం లేకుండా మరో సినిమా చేస్తానని దిల్ రాజు తెలిపారు. ఆ మాటను నిలబెట్టుకుంటూ కేవలం ఒక్క సినిమా అనుభవం ఉన్న రవి కిరణ్ కోలాకు అవకాశం ఇచ్చి అందరిని ఆశ్చర్య పరిచారు. ఇదిలా ఉంటే గురువారం విజయ్ దేవరకొండ పుట్టిన రోజు సందర్భంగా ఈ మూవీ నుంచి స్పెషల్ అప్డేట్ ఇవ్వనున్నట్లు మేకర్స్ ప్రకటించారు.
చెప్పినట్లుగానే మేకర్స్ ఒక పవర్ ఫుల్ పోస్టర్ రిలీజ్ చేసారు. ఈ పోస్టర్ లో కత్తి నేనే..నెత్తురు నాడే ..యుద్ధం నాతోనే ..అంటూ కత్తి పట్టుకున్న లుక్ సూపర్ ఉంది. ఈ సారి పక్కా మాస్ కథతో విజయ్ సినిమా ఉండనుందని ఈ పోస్టర్ చూస్తేనే తెలుస్తుంది. సినిమా దిల్ రాజు బ్యానర్ లో 59 వ సినిమాగా వస్తుంది.