మెగాస్టార్ చిరంజీవి ప్రస్తుతం ‘విశ్వంభర’ సినిమాతో ఫుల్‌ బిజీగా ఉన్నారు. బింబిసారతో సూపర్ హిట్ కొట్టిన డైరెక్టర్ వశిష్ట చిరు చిత్రానికి దర్శకత్వం వహిస్తున్న సంగతి తెలిసిందే. మెగాస్టార్ కు జోడిగా అందాల భామ త్రిష నటిస్తోంది. ఈ సినిమా సోషియో ఫాంటసీ నేపథ్యంలో
తెరకెక్కుతున్న విషయం తెలిసిందే.
ప్రస్తుతం ఈ చిత్రం శరవేగంగా షూటింగ్ జరుగుతోంది. MM కీరవాణి ఇటీవలే మ్యూజిక్ సిట్టింగ్స్ ప్రారంభించారు. ఇప్పటికే విడుదలైన ఫస్ట్ లుక్, టీజర్ చిత్రంపై అభిమానుల్లో మరిన్ని అంచనాలు పెంచింది. ఇక ఈ సినిమాను సంక్రాంతి కానుక‌గా రిలీజ్ చేసేందుకు సన్నాహకాలు నిర్మాతలు రెడీ అవుతున్నారు. ప్రస్తుతం విశ్వంభర షూటింగ్ చివరి దశలో ఉండగా చిరు తర్వాత ప్రాజెక్ట్ పనులు మొదలు పెట్టేశారు.
చిరు కెరీర్ లో 157వ చిత్రంగా రానుంది. ప్రస్తుతం ఈ చిత్రానికి సంబంధించిన స్క్రిప్ట్ వర్క్ చెన్నై లో శరవేగంగా జరుగుతున్నట్లు సమాచారం. రచయిత కమ్ డైరెక్టర్ బీవీఎస్ రవి ఈ మూవీకి కథా సహకారం అందించనున్నట్లు సమాచారం.మెగాస్టార్ తో గాడ్ ఫాదర్ చిత్రానికి దర్శకత్వం బాధ్యతలు వహించిన తమిళ దర్శకుడు మోహన రాజా చిరు 157వ చిత్రానికి కూడా దర్శకత్వ బాధ్యతలు చేపట్టారు.
మెగాస్టార్ ఈ సినిమా లో పెళ్లి అయిన మధ్య వయస్కుడి గా కనిపిస్తారని ఇండస్ట్రీ వర్గాల సమాచారం. చిరు కెరీర్ లో అత్యంత భారీ బడ్జెట్ లో రానున్న ఈ చిత్రాన్ని మెగాస్టార్ పెద్ద కుమార్తె కొణెదల సుస్మిత నిర్మించబోతున్నారు. త్వరలోనే ఈ చిత్రాన్ని అధికారకంగా ప్రకటించనున్నారు మూవీ మేకర్స్. ఈ ఏడాదిలోనే ఈ మూవీ షూటింగ్ ప్రారంభించనున్నారు. వచ్చే ఏడాది వేసవిలో ఈ సినిమాని థియేటర్లలోకి తీసుకుని వచ్చేలా ప్లాన్ చేస్తున్నారని సమాచారం.